‘समृद्ध नेपाल, सुखी नेपाली’ वेदकै भावनाबाट प्रेरित नारा स् केपी शर्मा ओली

काठमाडौं । नेकपा एमालेका अध्यक्ष केपी शर्मा ओलीले आफूले अघि सारेको ‘समृद्ध नेपाल, सुखी नेपाली’ भन्ने राष्ट्रिय नारा प्राचीन वैदिक दर्शनबाट प्रेरित भएको बताएका छन्। झापामा आयोजित एक धार्मिक अनुष्ठानलाई सम्बोधन गर्दै उनले नेपालको समृद्धि र नेपाली जनताको सुख–शान्ति वेदमा उल्लेख गरिएका मानवीय मूल्यसँग गहिरो रूपमा जोडिएको उल्लेख गरे।

अध्यक्ष ओलीका अनुसार राष्ट्र समृद्ध र नागरिक सुखी हुनुपर्छ भन्ने सोच कुनै नयाँ वा आयातित विचार नभई नेपाली सभ्यता र दर्शनमै आधारित अवधारणा हो। “हाम्रो देश समृद्ध होस्, जनता सुखी बनून् भन्ने कामनालाई मैले ‘समृद्ध नेपाल, सुखी नेपाली’ भनेर प्रस्तुत गरेको हुँ,” उनले भने, “यो भावना हाम्रा वेदहरूले बोलेको सन्देशकै निरन्तरता हो।”

उनले वैदिक मन्त्र ‘सर्वे भवन्तु सुखिनः, सर्वे सन्तु निरामयाः’ उद्धृत गर्दै सबै मानिस सुखी, निरोगी र सुरक्षित रहून् भन्ने चाहना नै नेपालको मूल दर्शन भएको बताए। कसैलाई पनि दुःख, भय वा असुरक्षाको अनुभूति नहोस् भन्ने सोच राज्य सञ्चालनको केन्द्रमा हुनुपर्ने उनको भनाइ थियो।

कार्यक्रममा ओलीले नेपाली सभ्यताको ऐतिहासिक योगदानको पनि चर्चा गरे। ज्ञान, दर्शन र विज्ञानका क्षेत्रमा नेपाली पूर्वजहरूको भूमिका उल्लेख गर्दै उनले शास्त्र निर्माणदेखि चिकित्सा विज्ञानसम्म नेपालभूमिको योगदान विश्वस्तरमा महत्वपूर्ण रहेको दाबी गरे। त्रेता युगका ऋषि सुश्रुतलाई विश्वकै पहिलो शल्य चिकित्सकका रूपमा उल्लेख गर्दै उनले प्राचीन नेपाल ज्ञान र सिर्जनाको केन्द्र भएको तर्क गरे।

अध्यक्ष ओलीले वेदले सिकाएको मूल सन्देश आज पनि उत्तिकै सान्दर्भिक रहेको उल्लेख गर्दै सबै नागरिक सुरक्षित, निडर र सम्मानजनक जीवन बाँच्ने वातावरण सिर्जना गर्नु नै आफ्नो राजनीतिक अभिप्राय भएको बताए। “सर्वत्र शान्ति होस्, कसैलाई आपत नपरोस्, सबैले सुखको अनुभूति गर्न पाऊन्—यही नै हाम्रो लक्ष्य हो,” उनले भने।

उनको भनाइले राजनीति र आध्यात्मिक दर्शनबीचको सम्बन्धलाई जोड्ने प्रयास गरेको देखिन्छ, जसले ‘समृद्ध नेपाल, सुखी नेपाली’ नारालाई सांस्कृतिक र दार्शनिक आधारसमेत प्रदान गरेको छ।